सेयर बजारमा दोहोरो अंकले वृद्धि हुँदा यी कम्पनीको बढ्यो नाफा

काठमाडौं ९ फागुन । सेयर बजारमा दोहोरो अंकको वृद्धि भएको छ । आइतबार ३९ अंकले घटेको नेप्से आज २५ अंकले वृद्धि हुँदा लयमा फर्केको हो ।
बिहीबार नेपाल राष्ट्र बैंकले मौद्रिक नीतिको अर्धवार्षिक समीक्षामार्फत सेयर धितो कर्जामा थप कडाइ गर्ने घोषणा गरेसँगै लगानीकर्ता आँत्तिदा आइतबार नेप्सेमा भारी गिरावट आएको थियो ।

सूचकमा सुधार आए पनि आज कारोबार रकममा भने ठूलो गिरावट आएको छ । अघिल्लो दिनको तुलनामा कारोबार रकम १ अर्ब बढीले घटेर ३ अर्बमा सीमित भएको छ ।

सोमबार नेप्से २५.४१ अंकले बढेर २७१८.५१ विन्दुमा पुगेको छ । आज २२४ कम्पनीको २ अर्ब ९९ करोड ७६ लाख ८१ हजार ७२ रुपैयाँ बराबरको ४९ लाख ९२ हजार ८७९ कित्ता सेयर किनबेच भएको छ ।

आज कारोबारमा आएका १३ वटै समूहको परिसूचकमा हरियाली छाएको छ । हाइड्रोपावर समूह सबैभन्दा धेरै २.२४ प्रतिशतले बढेको छ । त्यस्तै, होटल, फाइनान्स, अन्य र लगानी समूहको परिसूचक पनि १ प्रतिशतले बढेको छ ।

आज कारोबार भएका २२४ कम्पनीमध्ये १७० कम्पनीको सेयर मूल्य बढेको छ भने ४६ कम्पनीको घटेको छ । ८ कम्पनीको मूल्य स्थिर रहेको छ ।

आज नेपाल टेलिकमको सर्वाधिक कारोबार भएको छ । यसको साढे २६ करोड बढीको सेयर किनबेच भएको छ । त्यस्तै,जीवन विकास लघुवित्त २६ करोड र अरुण भ्याली १० करोडको कारोबार हुँदै शीर्ष तीन कम्पनीमा रहेका छन ।

दोहोरो अंकले बढेको बजारमा दुई कम्पनीको सेयर मूल्यमा पोजेटिभ सर्किट लागेको छ । युनाइटेड इदी मार्दी हाइड्रोपावरको सेयर मूल्य ठ्याक्कै १० प्रतिशतले बढेको छ भने गुँरास लघुवित्तका सेयरधनीले करिब १० प्रतिशत कमाएका छन् ।

त्यसैगरी, नेपाल हाइड्रो डेभलपर ७.१९, बुद्धभूमि नेपाल हाइड्रो ६.७२, साहस ऊर्जा ६.१२, एनआरएन इन्फ्रास्ट्रक्चर ५.३७, मनकामना स्मार्ट लघुवित्त, तेह्रथुम पावर, सामलिङ पावर, युनाइटेड मोदी र हिमालयन पावरको सेयर मूल्य ४ प्रतिशतले बढेको छ । त्यस्तै, न्यादी हाइड्रोपावर, सिंगटी हाइड्रोपावर, वरुण हाइड्रोपाव र मैलुङखोला जलविद्युत्का सेयरधनीले साढे ३ प्रतिशत कमाएका छन् ।