काठमाडौं । अरनिको राजमार्ग अन्तर्गत सूर्यविनायकदेखि धुलिखेलसम्म सडकलाई छ लेनमा विस्तार गर्ने कार्य तीन वर्षअघि सुरु भई हालसम्म ६७ प्रतिशत भौतिक प्रगति भएको छ।
करिब १६ किलोमिटर लामो यस सडकमा दुई लेनलाई विस्तार गरी दायाँबायाँ सर्भिस लेन र २.५ मिटरको फुटपाथ निर्माण भइरहेको छ। आयोजना निर्धारित समयमा सम्पन्न हुन नसकेपछि गत मङ्सिरमा थप एक वर्षको म्याद दिइएको थियो।
यो परियोजना दुई खण्डमा विभाजन गरी कार्यान्वयन भइरहेको छ—साँगा–धुलिखेल र सूर्यविनायक–साँगा। साँगा–धुलिखेल खण्ड (८ किमी) मा करिब ६० प्रतिशत मात्र काम सकिएको छ भने पिचबाहेक भौतिक प्रगति ९० प्रतिशत पुगेको बताइएको छ। उक्त खण्डको निर्माण जिम्मा लामा कन्स्ट्रक्सन प्रालि ले लिएको हो। यता, सूर्यविनायक–साँगा खण्डमा करिब ५५ प्रतिशत काम सम्पन्न भएको छ, जहाँ पहिले स्थानीय विवादका कारण लामो समय काम रोकिएको थियो।
हाल जनागाल, बाँसघारी–बुडोल, साँगा–भैँसेपाटी र बनेपा बजार क्षेत्रमा काम तीव्र पारिएको छ। सडक विस्तारसँगै टेवा पर्खाल, नाली र कल्भर्ट निर्माण भइरहेको छ भने साँगा क्षेत्रमा भौगोलिक जटिलता (घुम्ती र भिर) का कारण केही चुनौती देखिएको छ। यस खण्डमा पर्ने तीन पुलमध्ये महादेव खोलामा निर्माण जारी छ भने अन्य दुई पुलको डिजाइन ढिलाइका कारण काम पछि धकेलिएको थियो, जसको समाधान भइसकेको छ।
तातोपानी नाका सञ्चालनमा आएपछि यस मार्गमा सवारी चाप उल्लेखनीय रूपमा बढेको छ। हाल कोटेश्वरबाट दैनिक २,५०० भन्दा बढी सवारी साधन सञ्चालन भइरहेका छन्, जसले सडक विस्तारको आवश्यकता अझ स्पष्ट पारेको छ।
प्रतिक्रिया