रास्वपाको पहिलो महाधिवेशन असार ७ देखि ९ गतेसम्म चितवनमा हुने

पार्टी केन्द्रीय कार्यालय बनस्थलीमा आज बिहान बसेको केन्द्रीय समिति बैठकले महाधिवेशनको मिति र स्थान तय गरेको हो।

बैठकमा भएको छलफलपछि पार्टीका नेता गणेश पराजुलीले महाधिवेशनका बारेमा आधिकारिक जानकारी दिँदै असारको दोस्रो साता चितवनमा देशभरका प्रतिनिधिहरू भेला हुने निश्चित भएको बताए।

यसअघि पार्टी सभापति रवि लामिछानेले असार ६, ७ र ८ गते महाधिवेशन गर्ने प्रस्ताव अघि सार्नुभएको थियो। तर, केन्द्रीय समितिको विस्तृत छलफल र आन्तरिक व्यवस्थापनलाई मध्यनजर गर्दै एक दिन पछि सारेर ७, ८ र ९ गते महाधिवेशन गर्ने निर्णय भएको हो।

पार्टीले यसअघि नै चुनाव सकिएको छ महिनाभित्र महाधिवेशन गर्ने सैद्धान्तिक लक्ष्य लिएको थियो, जसअनुसार भदौभित्र प्रक्रिया टुङ्ग्याउनुपर्ने दायित्व रास्वपामाथि थियो।

२०७९ सालमा गठन भएको छोटो समयमै वैकल्पिक राजनीतिक शक्तिका रूपमा स्थापित रास्वपाका लागि यो पहिलो महाधिवेशन निकै महत्वपूर्ण मानिएको छ।

बनस्थलीमा जारी केन्द्रीय समितिको बैठकमा महाधिवेशनका विविध एजेण्डा, नीतिगत प्रस्ताव र सांगठनिक संरचनाका विषयमा गम्भीर मन्थन भइरहेको छ। यो महाधिवेशनले पार्टीको नयाँ नेतृत्व चयन गर्नुका साथै आगामी राजनीतिक दिशा समेत तय गर्ने अपेक्षा गरिएको छ।