काठमाडौं — टीयू क्रिकेट मैदानमा भएको पाँचपोखरी टी–२० जिल्ला स्तरीय क्रिकेट प्रतियोगिता वर्षाको कारण फाइनलमै रोकिएपछि मेलम्ची नगरपालिका र पाँचपोखरी क्रिकेट क्लब संयुक्त रुपमा विजेता घोषित भएका छन्।
खेलमा पाँचपोखरी क्रिकेट क्लबले पहिलो ब्याटिङ गर्दै १७।४ ओभरमा १३३ रनको मजबूत योगफल बनाइसकेको अवस्थामा वर्षा सुरु भयो। मैदान भिजेपछि खेल सुचारु हुन नसक्दा निर्णायकले दुवै टोलीलाई संयुक्त उपाधि दिने निर्णय गरे।
दुवै विजेता टोलीले ७५ /७५ हजार रुपैयाँ पुरस्कार प्राप्त गरेका छन्।
मेलम्चीका रिन्जिन लामा प्रतियोगिताका सर्वोत्कृष्ट खेलाडी घोषित भए। उनलाई ग्रेट हिमालय क्रिकेट एकेडेमीले ६ महिनाको निःशुल्क प्रशिक्षण दिने घोषणा गरेको छ।
त्यस्तै, उत्कृष्ट ब्याट्सम्यान द माइटि साँगाचोकका अशोक पौडेल र उत्कृष्ट बलर मेलम्चीका सोनु देवकोटा घोषित भए। यी दुई खेलाडीले पनि हिमालय क्रिकेट एकेडेमीबाट ३/३ महिना निःशुल्क प्रशिक्षण पाउने भएका छन्।
प्रतियोगितामा आयोजकले छनोट गरेका थप ३ उत्कृष्ट खेलाडीलाई एन्जल्स स्पोर्ट्स एकेडेमीले ३ महिनाको प्रशिक्षण दिने व्यवस्था मिलाइएको छ।
प्रतिक्रिया