काठमाडौं ३फागुन।कोरोना भाइरस कोभिडको कहरका कारण बन्द रहेको रामकोट स्थित स्विजरल्याण्ड पार्क वनभोजका लागि फागुण ७ गतेबाट खुल्ला गरिने भएको छ । वनभोजका लागि पछिल्लो समय धेरैको रोजाइमा परेको यो ठाउँ काठमाडौं उपत्यकाको पश्चिम भेगमा अवस्थित छ । यहाँको वरीपरी बिभिन्न महत्वका ऐतिहासिक स्थलहरूको अवलोकन गर्न सकिन्छ । कलंकी र सितापाईलाहुँदै मोटरबाटो भएर पुग्न सकिने ‘स्विजरल्याण्ड पार्क’वरपर दहचोक, ईन्द्रताल, मनकामना मन्दिर, काजी कालु पाँडेको समाधिस्थल, राजा पृथ्वीनारायण शाहको समयदेखि बडा दशैँको अवसरमा पशुवलिदिने स्थान, घुन्सा हेलिकप्टर दुर्घट्नामा मृत्यु भएका २४ जना स्वदेशी, विदेशीहरूको अर्धकदको शालिक निर्माण स्थल, भ्युटावर लगायतका रमणीय स्थानको मनोरञ्जन लिन धादिङ, ललितपुर, भक्तपुर लगायतका मानिसहरू बिदाका दिन वनभोज खान आउनेको बाक्लो उपस्थिति रहने गरेको उपभोक्ता समितिका सनतकुमार गिरीले बताउनुभयो ।
गिरीका अनुसार पार्कमा बनभोज खान आउनेहरुका लागि कुनै कुराको असुविधा नहोस भनेर पार्कमा समितिका सदस्यहरु खटिने गरेका छन् । पार्कबाट देखिने उपत्यका भित्रको मनोरम दृश्यमात्र होईन, नजिकै देखिने हिमश्रृङ्खलाको लोभ लाग्दो दृश्यले पनि एक चोटी पुगेको व्यक्तिलाई पुनः आकर्षित तुल्याउने गर्छ ।