काठमाडौं,१ असार । विपक्षी दल राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) ले प्रतिनिधिसभा बैठकमा अवरोध कायमै राख्ने पुरानै अडान दोहोर्याएका छन् ।
भिजिट भिसा प्रकरणमा गृहमन्त्री रमेश लेखकको राजीनामा र छानबिन गर्न संसदीय छानबिन समिति गठनको माग गर्दै निरन्तर संसद अवरोध गर्दै आएका रास्वपा र राप्रपाले आइतबार बिहान सिंहदरबारमा सभामुख देवराज घिमिरेले गरेको प्रमुख दलका प्रमुख सचेतक र सचेतकहरूको बैठकमा आफुहरु पुरानै अडानमा अडिग रहेको जानकारी दिएका हुन्।
बैठकपछि सञ्चारकर्मीसंग कुरा गर्दै रास्वपाका प्रमुख सचेतक सन्तोष परियारले सरकारले आफूहरुको माग पूरा नगरेसम्म बैठकमा अवरोध कायम रहने बताए ।
उनले भने ,‘हामीले भिजिट भिसा र अध्यागमनको प्रकरणमा रास्वपा आन्दोलनमा छ । सरकारले त्यो मुद्दा जुन गम्भीरताकासाथ लिनुपथ्र्यो लिएन । यत्रो मानव तस्करजस्तो मुद्दामा केही सुनुवाई भएन । गृहमन्त्री लेखकको राजीनामा र छानबिन समितिको माग गरिरहेका छौँ । यसमा गम्भिरतापूर्वक लिएर माग पूरा नभएसम्म अवरोध जारी राख्छौँ ।’
उनले प्रमुख प्रतिपक्ष दल माओवादीले न्याय दिनेगरी सहमति नगरेको बताए । यस्तै, राप्रपाका प्रमुख सचेतक ज्ञानबहादुर शाहीले पनि संसदको अवरोध कायम राख्ने बताए ।
प्रतिक्रिया